GoHome.com.hk
ENG

熱門村屋地區-西貢非獨立排屋 200萬就有交易

2016-10-18 11:40:45

講過咁多村屋注意事項,大家應該對村屋都有基本認識,遇唔同問題都知道點樣警惕,可能大家都想了解下唔同地區嘅村屋市況。

先講下西貢區,一講西貢,香港後花園喎,大家或者會認為樓價一定貴到好離地。不過,港基地產代理高級物業顧問吳文輝(Ken)就話,區內一些面積700方呎的中層村屋單位,入場價介乎370萬至430萬元不等,相比起市區價錢相若嘅上車屋苑,面積大好多。若以非獨立的排屋來說,面積350至435方呎的單位,更可能平到200萬就有交易。

西貢村屋盤搜尋

西貢村屋Sai Kung - Hong Kong

Ken表示,蠔涌新村係區內有較多分層村屋嘅地方,優點係近車路,村屋樓齡又相對較新,頗受外區上車人士歡迎。

延伸閱讀:熱門村屋地區-元朗錦上路村屋 28分鐘到香港站

精明嘅網友可能會話,西貢好遠喎,搭車出入都好貴啫。雖然西貢同大部分人嘅工作地點確係比較遠,但對於本身就係有車之人嚟講,條數計法可能有少少唔同。

Ken解釋,現時在西貢租用泊車空間的使費,大約每月800至1000元,比起市區停車場郁啲都要2000至3000蚊平得多。到底市區養車平定村屋養車平,權衡車程同交通或養車開支之後又應該點選擇,大家可以計計數。

延伸閱讀:租住村屋5個要留意事項

佢又補充,全幢2100方呎嘅村屋,入場費大約1300萬,中等質素要1500萬至1600萬左右,但實際價錢要視乎地段;而龍蝦灣同輋徑篤路,都係全幢村屋較多嘅地方。

至於市況,Ken話10月上半月西貢區大約有25宗成交價1000萬元以下嘅中細價樓成交,雖然比之前幾個月略為減少,但考慮到之前屬於傳統旺季,市況都算係大致保持平穩;投資者受辣招影響,入市比例唔高,只佔兩成,市場繼續由用家主導。

返回村屋攻略目錄