GoHome.com.hk
ENG

村屋與一般住宅按揭大不同

2016-10-18 12:41:23

村屋同其他私人住宅物業一樣,可以向銀行造按揭貸款。不過,要留意按揭成數和估價不足的問題,稍一不慎隨時上唔到會,撻Q收場,記得睇路呀!!

村屋_Hung shui kiu

好多首期有限的年輕人,會透過按揭證券公司的按揭保險計劃,借足九成按揭,以低至一成的首期上車,但要留意村屋按保屬另一計劃。

延伸閱讀:村屋有幾多種?村屋 丁屋 舊屋地分別

自2006年初,按揭保險計劃接受村屋按揭的申請,各貸款機構便以提供低息及較高成數的按揭進佔村屋市場。首次置業人士最高只可承造八成半按揭,與一般私樓的最高按揭成數為90%為低,以樓價300萬元為例,私人住宅及村屋首期相差15萬元,對於手頭緊的朋友來說不是小數目,更何況銀行未必會批足八成半按揭,入市前一定要留意這一點。

參考:按揭保險計劃

另外,雖然按證公司資料顯示,村屋按保最長還款年期係30年,但實際好多銀行都只會造25年、甚至更短年期的按揭,而且好多時樓齡同按揭年期加埋唔可以超過40年。換言之,村屋按揭年期較普通住宅短,同一貸款額下,每月的還款額會較多,準買家要注意能否通過金管局要求的壓力測試。

估價不足亦係新手買村屋一個常見問題。明明都係做按揭,點解村屋好似特別多阻滯? 是咁的,村屋質素差異大,而且交投相對疏落,欠缺參考指標,銀行估價取態往往較為保守,當中尤其以位置偏僻、無車路可以到達、以及面積並非標準700方呎的村屋,估價不足的情況較為普遍。

村屋盤搜尋

相反,一些近主要車路、有公共交通接駁、或具規模和有管理的村屋屋苑,質素較高,成交亦較頻密,相對而言較易估足價。所以,一開始叫大家睇路唔係講笑,有路定無路,真係會影響估價㗎!

每間村屋條件差異好大,僭建亦可能影響估價、甚至唔批出按揭,所以銀行可能需要實地考察,不設網上預先估價,買家要自行聯絡銀行;而且銀行會因應風險自行決定按揭年期、成數等條款,所以最好在簽臨時買賣合約之前,先獲得銀行預先批核。

延伸閱讀:租住村屋5個要留意事項

最後俾多個小貼士大家,好多朋友覺得有一間銀行造按揭就OK啦,其他銀行唔批唔緊要,但如果你間屋只得一間銀行肯做按揭,將來轉手買家亦可能會遇到上會困難,可能間接影響物業將來的成交價。過往只有小型銀行會承造村屋按揭,但近年按揭市場競爭激烈,有些大型銀行亦加入戰團,所以,如果睇啱某村屋,不妨多問幾間銀行,咁亦可以詳細比較條款再作決定。

返回村屋攻略目錄