GoHome.com.hk
ENG

樓市工商怪現象

2012-10-17 00:00:00

近期聽得最多嘅係話「樓價已經超越九七」、「香港樓市泡沫未至於爆破」等等,而香港地產市道奇怪現象每日都在發生,現時更加蔓延至工商。

先講住宅,呎價現時猶如海鮮價,講得跨張一點,即係每日呎價都會不同。好多地產代理一返工,除咗要了解同區放盤量及樓市最新消息外,還要一再詢問業主是否繼續以原先簽放盤紙嘅價錢放售,即使業主售價不變,地產代理最終真係找到合適買家,很多業主會用各種理由來拒絕成交,企圖將樓價抬高,讓買家追價,反價封盤不絶,所以今時今日做地產代理都唔易做。

而工商方面,可能因為不受SSD影響,其呎價及呎租價升幅驚人,以前業主都會參考市場價再訂出一個合理及有水位既價格,務求可以喺最短嘅時間內將單位放售或放租,以免令單位交吉太耐而造成損失,但現時業主只管開出一個天價價錢或是小商戶無法承擔的倍數租金,不管買家有無心去買、租客有無心續租都好,業主寧願單位交吉半年都唔肯降價,莫講話減租、議價,就算話係高於市價3成、租金升幅超4成,業主都依然企硬。

以前我遊走不同街舖,總會看到一些老字號舖頭又或是特色小商戶,但現時某些自由行經常出入的地段,街道兩旁都只有藥房、名店坊,各大小商場進駐商舖幾乎一式一樣,似乎整個香港都要變成自由行購物區,不再適合居住,只可以當遊客區,本人並無意歧視任何國籍的人士,只係覺得如果小業主或租客都只一味以追逐高價的話,就不能只一味埋怨發展商地產霸權!

近日某位官員說,不要恐慌性買樓,我認為呢句說話正正可以反映到現時香港人既心理,既擔心買唔到樓、又擔心買貴樓,試問如果一窩蜂去買一樣野,唔好話買樓,就算好似之前啲人「盲搶鹽」,都會貴幾倍啦!所以現時樓市的怪現象,無論業主定買家都有相當責任。

返回買家記事簿目錄