GoHome.com.hk
ENG

樓價升溫get set go

2012-08-22 00:00:00

所謂「不排除再推出首次置業貸款和夾心階層住屋計劃」,就即係未推出。由意念至到推行,都需要時間籌備,更何況政府目前都夠多野煩,睇怕除左用白表政策之外,暫時都只可以乾眼睇樓市。

香港土地資源係咁多就咁多,講咁多都冇用,最重要都係睇供應。賣一塊地皮,就真係少一塊,曾爵士年代又冇做過規劃,要係咁短期間扭轉局面,談何容易?所易樓市仍然係升不停。同埋,就算真係政府咬實牙根要同樓市死過,都要由庫房撥資源,又要等外國寄原材料黎,計埋人工同興建時間,冇番三五七年,大家都係唔洗諗住增加供應。係咁既情況下,樓市點可能大跌?

再加上,政府批地過程,經過咁多年已經僵化;無論起幾多個單位,程序由搵地、改規劃、諮詢、重建等等,都要經過一大堆過程,拎一大堆批文,又係等到大家烚眼訓。計落計落,當然又係三五七年。再加埋人工物料,要麵包(私人樓)平一大截比人,似乎都只係發夢。

事實上,近期白表政策已經令好多原本係公屋住緊既綠表客,出黎搶居屋。呢批購買力釋放出黎,又咪搞到居屋市場都貴埋,最後白表客又係望洋興嘆。有論述話白表客會被趕到買番私人樓,但Prof. J就認為,如果佢買到私人樓一早買左,應該就白表屋居同私人樓都買唔到喇!

其實,即使近期樓市點去,政府同商界都只會不斷強調樓價飆升係短期內既事。政府如果唔咁講,根本過唔到民意,亦令人心惶惶,惡化局面。商界如果唔咁講,即係佢地都覺得長升長有,你話政府做唔做野丫拿?所以,商界對於樓市既口脗,點都係審慎既!

事實上,發展商審慎還審慎,當然都會話樓市係個好既投資;任何情況都同一口脗,大家其實唔洗當係一個分析。事實真相係,短期間利率唔會回升,市民大眾供樓成本唔重;由金融政策分析,大家可以預期去到2014年供樓成本都唔會點上升。經過聯儲局近期議息,同埋樓價跌唔落,亦令到好多觀望既資金開始回復信心,重新回流。加上居屋新政刺激下,各區都出現反價封盤。

仲有一件事–白表政策難有效。大家諗下,白表客買既樓邊度黎?若然政府冇新樓提供,白表客亦只可以由目前二手居屋市場入面搵樓。大家話,依家有邊個居屋業主願意免補地價放樓比白表客呢?再加上,有幾多盤又未比綠表客搶晒呢?種種因素夾雜之下,樓市只會有升無跌。繼續get set go lar...


-------------------------------------------------------
徐燦傑 Jeslie Chui (Professor J)
jeslie@ecom-icom.hku.hk
個人簡介︰
- 香港大學工程學院計算機科學系(電子金融服務)榮譽助理教授
- now財經台 ──逢星期二、五「名家給力場 – Prof J 」主持
- 新城財經台 ──逢星期六「投資超廣角」主持
- 財經刊物,報紙,網站專欄作家,包括定期於東方日報, 太陽報「金融徐筆」、智富雜誌(iMoney)「精心傑作」、
  資本一週(Capital Weekly)「賓架人語」等發表文章

- 財經書作者,著作超過23本,總銷量逾130,000本
- 女人魅(F generation) 有限公司董事總經理

返回Professor J 樓市財經論目錄