GoHome.com.hk
ENG

樓價與口術背馳

2012-09-17 00:00:00

事實證明,口術根本對實體經濟唔會有任何作用,樓價問題始終歸結番原因係供求失衡方面,一日供求實衡問題未解決,樓價居高不下已成定局。加上內地客搶盤大小通吃,小型盤買小見小,樓價灼熱程度有其實質支持,並非只得個炒字。

梁十招出台之後,樓價照破頂,內地豪客更懶理一切,係一、二手市場搶盤。事實上,內地日打夜打,樓價被按住唔放,咁對於內地客黎講,又想投資地產升值,又咩就手得過香港樓?呢點唔難理解。

面對近期樓市瘋漲,梁特首推出十招短中長期措施,目的係穩定樓市。到底有冇效?比較好似有料到既,算係將最先既一千個置安心轉租為賣,八百三十個居屋貨尾單位下年初進入市場;係未來六個月至一年,有近二千個資助單位出售。同時政府會加快審批預售樓花,目前正處理九千個單位。中期會將三十六幅政府地改建為住宅。

1997年8萬5政策,係香港未有今日如斯短缺既情況下,結合環球金融風暴,對樓市做成殺傷力,令數以萬計既人負資產。不過,果時美國仲未有量化寬鬆政策,加上全民炒風熾熱,所以先做成衝擊。相比起當年既
8 萬 5,大家又計下,加入內地豪客資金掃盤,美國量化寬鬆政策,呢幾年既「無為而治」,梁十招既規模唔通真係可以成功壓抑樓價?

金融市場入面,流通量高既地產股亦已經炒到二、三線,又有資金玩尋寶,吼二三線磚頭股,貪有數得計。依照目前既樓價走勢,計番每間公司既賣樓收益以及市帳實值,好多基金都唔理三七二十一,見磚頭同條數掂就照掃。金融市場如是,樓市如是。

好似近日嘉華國際中期純利大增,皆因受惠於樓價過去兩年持續上升,吸引左唔少磚頭擁眾。其實依家係一個擺盪,之前大家都好擔心我地既特首會對樓市作出「救民措施」,驚打壓過重;依家樓市冇受打壓不特止,有變本加厲跡象,當然會吸引好多之前「估錯行情」既資金重新走入市場,係咪?

早係2007年,大家已經開始提醒住宅開始有少少熾熱,但係房屋政策冇絲毫變改。當樓市既上升變成民生議題,代表社會已增添許多不穩定元素。到2008年時,內地推行四萬億救市政策,內地資金泛濫,當中有唔少落左黎炒股炒樓。目前既樓市,夾雜住以往美國量化寬鬆令港元弱勢,加上內地泵水引水灌田等等既力量,又點會咁易被壓落去?

當然,Prof. J 覺得一個社會要穩定,必需要一個穩定既樓價;不過,想還想,種種現象分析,樓價仲係要升。
 
-------------------------------------------------------
徐燦傑 Jeslie Chui (Professor J)
jeslie@ecom-icom.hku.hk
個人簡介︰
- 香港大學工程學院計算機科學系(電子金融服務)榮譽助理教授
- now財經台 ──逢星期二、五「名家給力場 – Prof J 」主持
- 新城財經台 ──逢星期六「投資超廣角」主持
- 財經刊物,報紙,網站專欄作家,包括定期於東方日報, 太陽報「金融徐筆」、智富雜誌(iMoney)「精心傑作」、
  資本一週(Capital Weekly)「賓架人語」等發表文章
- 財經書作者,著作超過23本,總銷量逾130,000本
- 女人魅(F generation) 有限公司董事總經理

 

返回Professor J 樓市財經論目錄