GoHome.com.hk
ENG

細價樓實質需求激發

2012-09-03 00:00:00

話口未完,細價樓就節節上升。大家都知道,之前樓市淡靜落黎,個價都唔肯跌。依家知道特首梁10招對樓市既政策都係唔傾向打擊時,冇殼蝸牛終歸要搵番個殼,當然要搶細價樓啦,係咪?如果唔係,睇住早排租金不斷上升,貴過自己供樓,果種滋味殊不好受。

嘉湖山莊,可能係你最理想嘅豪宅……」,呢句話當年做瓜左唔少人。經過9703洗禮,十年人事幾番新,細價樓已經重生。近排睇番數據,嘉湖山莊平均呎價道然去到3800蚊,比起20121月升左22%。樓價指數升破97高位,意味住乜野?

大家可以搵番相類型既屋苑作比較。沙田第一城今年樓價升幅又係勁到爆燈,較1月個平均呎升左24.6%。有一批買家係早前賣樓太急,依家換唔到樓,個價又不斷標上去,索性貼埋價差,重新買番間屋住。大家可以見到,果批價格升到癲既屋有咩特點 – 細。一來,買家冇足夠既銀彈去買更大既單位;二來,買呢類型單位擺明係有實際需要。只要特區政府一日唔正視私樓供應量不足呢個問題,一日樓價都會受制於「求過於供」既情況。

老實講,特區政府一額煙,又要為劏房事件提供解釋,又要搞國民教育,點會有時間著實處理房屋問題。大家見到,依家既房屋紓緩政策,都仲係要上屆政府留落黎既。政府一直呢幾年都冇能力控制樓價,即使政策真係出爐,都唔會短期有效。聰明既業主當然二話不說,個個獅子開大口。事關計落計落,冇番三五七年,根本樓價唔會點落,拎住層樓坐和望贏,何用慌張?

凡事敵不過數據。8月頭廿三日全港有7,515宗樓宇買賣登記,大增39%。呢個數據充分講左大家對樓市既取態。無他,新特首表明唔推倒樓市,新居屋政策又刺激居屋同私宅市場既需求,買樓人數大增,理所當然。

一、二手住宅工商舖,三類物業交投都回復熾熱。最重要係,市民已經對政府打擊樓市既方法感到失望,之前積壓多月既購買力,開始陸續進入市場。事實上,一知道左政府立場唔係極度強硬時,唔單止住宅市場,所有地產項目都突然洛陽紙貴。

樓市係個漫長既週期,趨勢一旦形成,短期唔會轉變。好簡單,短期內,冇可能由一塊空地憑空想像多左一層樓。既然供應冇可能突然瘋狂增加,好多時就會睇番需求。需求面又好講價格預期,當大家都知道現屆政府既房屋政策時,自然有一定既價格預期。

-------------------------------------------------------
徐燦傑 Jeslie Chui (Professor J)
jeslie@ecom-icom.hku.hk
個人簡介︰
- 香港大學工程學院計算機科學系(電子金融服務)榮譽助理教授
- now財經台 ──逢星期二、五「名家給力場 – Prof J 」主持
- 新城財經台 ──逢星期六「投資超廣角」主持
- 財經刊物,報紙,網站專欄作家,包括定期於東方日報, 太陽報「金融徐筆」、智富雜誌(iMoney)「精心傑作」、
  資本一週(Capital Weekly)「賓架人語」等發表文章

- 財經書作者,著作超過23本,總銷量逾130,000本
- 女人魅(F generation) 有限公司董事總經理

返回Professor J 樓市財經論目錄