GoHome.com.hk
ENG

諗Sir: 窮Case研究 怎成為富有的香港人

2016-03-22 10:52:58

LamsirBlog

Hi諗sir: 小弟有睇開你本書 而家去到適婚年齡所以要為未來plan下,窮中產case… 本人二十七歲,月入兩萬八,一年bonus可以有二十到三十萬 女朋友二十六歲,月入三萬四左右 依家手頭上股票連現金大約有110萬,(股票30萬左右) 一向我同女朋友都無乜點儲錢,一年去三四次旅行,可以講衣食無憂,無家庭壓力。

問題 兩年內,其實有幾樣priority 1. 上車結婚,其實以我地能力,應該買咩價位?我心目中就大約400至500萬。不過如果買600萬,會唔會好吃力? 2. 我地亦有想過買兩個單位,每個價位大約三百萬,又可唔可行? 3. 其實都想做返小小投資,大約5%收息就可以.現時有咩比較穩既choices?(現時股票大約6%)insurance(儲蓄保險)供一萬一個月,供五年個D其實好唔好?

諗sir答: 讀者同女友月入超六萬、加上bonus一年有200k至300k,客觀黎睇完全唔窮。惟看來文筆者有感、讀者真正窮的是在心裡。一年去3至4次旅行及衣食無憂、筆者真不想是27歲香港男/女生的理想生活模式、至少唔希望自己個仔第二日係咁。當然、讀者唔係異數、閣下在facebook見朋友post日本登機放閃的情況常發生、又或香港銷量最高書藉持續為日本、南韓旅行書可解此象。近日發生連續學生墮樓自殺案、不少人即上崗上線、話同旺角混亂事件尤關、又話要邊個人負責云云,懇請大家不要將香港的家事政治化。身為家長認真檢討每日花幾多時間係小朋友身上、及陪伴小朋友的時侯究竟有否用手機、抑或將工作「外判」比菲傭?

講到呢度想起3年前的個案,#458「窮中產如何上流?」,讀者表示「多謝你既回應,你本<<樓換樓>>我同老公已經細心閱讀過,實在獲益良多。其實睇完之後,覺得自己好落後,以前成日以為自己係專業人士,有份穩定既工,放工睇無記,咁又一day,真係99歲既阿毛都醒過你。我同老公決定發奮,第一步起碼買多一間樓…」,筆者銘記至今、成為每日寫文的動力。 -

二十年華、感衣食無憂、錯在父母。社會誘惑太多、窮人而無原則者亦多,他日衰自己或衰係人地手上幾可肯定會、而當中挫折切勿等父母離世後才讓仔女獨自面對。當然,讀者起碼都有諗過自己付費結婚買樓、那就由計呢條數開始。兩人借貸力max為:(28000+34000)/10000*50%*2.59=8mil。留意bonus係有機會計埋入借貸力之內、不過到時要再睇文件齊唔齊。讀者買樓、難不在借、而難於買600萬樓要比180萬首期,因做埋九成按都只可借盡420萬。

對於讀者發問,兩年間儲唔到180萬、除非特首撤辣、否則暫不用有靠自力買600萬樓之想法。若要買樓+結婚、假設結婚洗費為50萬、今時至結婚之間要儲既金額為(180-110)+50=120萬。當然可以比條平d既路讀者考慮,就係買450萬既樓、即可利用420萬儲盡之利、九成上會、首期45萬、加埋雜費同裝修另加30萬、計埋結婚45+30+50=125萬攪掂。即平住450萬樓、如舊型大屋苑兩房、由於讀者工資好所以未來兩年儲15萬即成!

當然有人心想:「新樓都只係賣緊298萬、點解要450萬買舊兩房?」這在於幾百萬就買到既新樓地理位置不佳、加上入住後管理費高近$4.0/呎、買新樓者等於借入幾百萬再自願比管理處每月打劫!如果想住新樓、大把新盤個租等你鋤。可以用錢買入流轉量高的大型舊屋苑收租再用其租金補貼租新盤、即又將$4.0管理費卸比業主!

打工仔基本上要有儲錢習慣,生意人可以無。打工仔每月幾萬咁搵返黎、生意人每出一轉貨返幾十個、理財模式大不同。當然做生意亦艱難、不在此述。同意打工同做老闆只屬你睇佢好佢睇你又好之象。一個月入5萬的人、當30年工作生涯能將月入一半儲起、一世人儲到9百萬、係九龍站買間兩房都唔夠、試問個人財務規則怎可欠缺呢?至於double保險合一些想篤定有首期5年後要買樓既朋友、或老成想又保本又唔怕hold5年既投資人。讀者年輕宜用有波幅的債基加股票混合、後生不冒風險、將來損失更大。

如有投資理財問題想向諗sir請教,歡迎發私訊至GoHomeFacebook專頁(www.facebook.com/GoHomeHK),並註明「投資諗法讀者信箱」。GoHome.com.hk會揀選合適的問題轉發給諗sir。

返回投資諗法目錄