GoHome.com.hk
ENG

諗Sir: 男人的感慨 同資金比賽

2016-06-07 10:45:15

palmface 諗Sir: 本人同太太33歲,有兩個小朋友,分別3歲及6歲。2010年結婚一直租樓,但上年太太因開始全職照顧小朋友收入減少。難敵租金,決定搬返阿媽屋企住。3大2小屈係一個買斷公屋單位。要兩個女人咁同我捱,實為男人之無奈。今年頭太太開始再返工,不過月入不如以前。

我同老婆月收入共為3.7萬,手頭資金約有60萬,兩個小朋友開始大,家用,保險,學費支出都幾大。而家每月只可儲約5000。不過就算環境唔係太好,我仍想一家四口搬返出去住,就當大仔開始返學,照顧兩個小朋友令阿媽好勞累。

我明白自己人工低,但要改善要人工都唔係年內做到。而家想快手上車買間樓。如果把現住公屋出售(綠表),可以套現150萬。計劃建議阿媽用當中100萬去收息,每年收7%息(最好有10%),作媽媽家用。其餘借30至40萬比我,再加埋手上60萬做首期,希望8至9成上會。

近日比經紀sell買朗屏新盤,話可以廿幾萬首期即可上車、仲要20個月之後先開始供樓。買新樓好嗎?經紀話如果我一個人唔夠借錢上會,佢地有人幫手,係呢20個月教我我安排文件做大個數好去借錢,係咪真係可以咁? 若果廿幾萬有新樓住,真係好吸引。我又可以慳些少錢係手。咁做一來可以上車先,二來可以改善居住環境。請問諗sir意見如何?我已報收息班學習如何增加被動收入,現時也入手一兩隻美國ETF賺價。ETF的確好特別,乜都有得玩,學習中。

ANSWER: 三大兩少老婆同老母屈埋間公屋,明白確實有點苦。仲要間屋係阿媽名下,老婆比說話老公聽就難免。難得有人推銷新盤8號!男人應否接受援助?

簡單計,呢個男人有100萬係手,錢就冇乜點淨,咁究竟應該買新盤定舊樓?

在首期上,若夫婦是但一人從未買過樓,仍可九成上會。若你是支票出糧,交足文件都可九成上會的。最怕是現金出糧又唔交稅者,咁就真係好難救。至於新盤8號,330至400萬的多是一房單位,如果要似樣,又可助讀者改善環境的兩房單位,價位在500萬以上起跳。五百萬價碼在不少地方都有好選擇,如買三十幾樓齡的單幢樓,約450呎實用的三房於400萬以下都有機會入手。

買新樓另一唔好處係焗業主自住。如果係樓花期改變主意想租比人,由於收樓期租盤大量供應,令租值大幅被壓。另外新盤管理費多高昂,加上新裝修比租客住折舊極快。所以新樓買黎自住仲可以,租比人真係唔好試。

至於20個月樓花期可塑造文件令銀行手鬆借錢、這個筆者是同意的。不過經紀哥哥係賣左樓收左佣之後,會否用心教你完成此事又另一回事。一般人未親身做過,就咁用公司開幾張支票比自己出糧,基本上比職員問兩句就露餡。我認為知識不值錢、但經驗就好值錢。我地無論係收息101或買樓課,幫到同學錯少一次已省下不少時間金錢。

讀者收入屬較低一群,借用筆者早前個案「成家夾埋儲六千!如何改變下半生?」同一道理:窮人必需博。中產反而可以走死位慢慢屈機陰死個大佬。

前兩天個案讀者收入低無儲蓄、但有間樓係手,建議賣樓得十年儲蓄去博一博。今天個案是讀者收入低都係少儲蓄,建議係唔買樓博個市跌,雖一個建議賣樓另一個建議唔買樓,但所用道理都是相同,就係窮人必須博中個市升或跌去翻身。而若你夫婦每人月入已在2萬或以上,你地已有起碼條件去買樓收租cap死d租客幫你儲錢,所以無需要去博。

知道有些人話香港平均工資只1.5萬,所以筆者稱2萬工資以下的人為「低收入」實在很涼薄。其實用平均數去解釋一件事,基本上已解釋緊你「中左毒」。若你係想將自己工資同60歲跑返去圖書館撈parttime既阿婆比、或者初出黎做野幾年既後生仔比、而你年過30仲有咁思想實不應該。若你年在25,應怎看待本網?建議你認真看待,就真係跑快人一步。學好理財、有用過贏在什麼起跑線。筆者認識身邊一些賺到錢、又值得尊重的朋友,佢起跑個下真係做得幾差。不過亦因如此佢見慣大場面,跑道有炸彈或熱到33度佢仍可照去。

若仍對平均法作結論一事感疑惑,或想知多點,建議便宜的買本書<黑天鵝效應>。此書過往已有不少人談及,或你已全本看完。其中重點是今時黑天鵝現象比往時多,就係因為有人太濫用平均數,令人忽略係統計上處於邊緣的sample。”The Problem Is Too much generalization”! 大家再聽乜乜乜人同你講乜乜平均係點樣,你真係要小心。男人要醒係要判斷,誠哥可以玩你因為你死做。

返回投資諗法目錄